Arsızdı söylətmə dəli könülü,
Düşər bir qönçəyə gül istər səndən.
Min bir dərdim ürəyimə gömülü,
Qazıb çıxartmağa bel istər səndən

Yıxar ürəyimi salar fəryada,
Amma boyun əyməz gedib hər yada.
Coşub çalxalanar bu gen dünyada,
Dəryaya çatmağa sel istər səndən.

Eşq atəşidir ürəyimə düşübdür,
Od alovla, kabab olub, bişibdir.
Şikayət deyil, qəlbə od düşübdür,
Külü od eyləyən yel istər səndən.

Gözlərimdən axar dayanmaz selim,
Lal eylədin məni danışmaz dilim,
Qırmısan qolumu tutammır əlim,
Dərdimi deyəcək dil istər səndən.

Usandı taqətim qalmadı macal,
Səni sevməyimlə oldum halbahal,
Əzraildən öncə canımı gəl al,
Kəsilən əlacım hal istər səndən.

Soldurdun bağımda qönçə gülləri,
Gəzərdik bir zaman sənlə çölləri,
Yadıma saldıqca keçən günləri,
Aşılmaz səddlərdən yol istər səndən.

Tapammadım sənlə dərdə çaranı,
Sarımadın qəlbimdəki yaranı,
Açıb mənlə gizli qalan aranı,
Yaramı sarmağa əl istər məndən.

Daha şikayətə qalmadı sözüm,
Haqdan danışdıqca haqsızam özüm,
Qanlar axıtmaqdan qanlıdır gözüm,
Silməyə təsəlli, əl istər səndən.

Vüsalam ömrüm keçir xatirə,
Yazdıqlarım çatmayır ki cahilə,
Lövbər saldın indi başqa sahilə
Dəryada boğulan əl istər səndən.