Gecələri qalardımmı yuxusuz,
Sevən qəlbim qəm- qüssəylə dolmasa?
Tab etməyən aşiq olar duygusuz,
Dözmək olmaz, əgər ümid olmasa.

Sevən aşiq susar, cəksə də acı,
Dərdə sayar öz dərdinin əlacı.
Sevdiyinə deyər “başımın tacı”,
Dözmək olmaz, əgər ümid olmasa.

Qürurlanan rəsmin baxa tək mənə,
Qulağıma səsin axa tuş yenə.
Deyiləcək sözüm qala kaş sənə,
Dözmək olmaz, əgər ümid olmasa.

Məhəbbətsiz həyat məni yaşatmaz,
Ahıl yaşa ömür çatar, ya çatmaz.
İmkan olsa, kim “şeytana daş atmaz”,
Dözmək olmaz, əgər ümid olmasa.

Mənli günlər xatirəyə dönməsin,
Göz neyçündür sevdiyini görməsin.
Gözlə, yarım, təki ümüd ölməsin,
Dözmək olmaz əgər ümüd olmasa.

Sevən ürək hey arzular vüsalı,
Bizim bu sevgimiz, bir eşq masalı,
Sevməyin gözəldi inan, hər halı,
Dözmək olmaz, əgər ümid olmasa.

Gündən günə çətinləşir bu həyat,
Xatirələr çəkir məni o saat,
Göz yaşlarım çalır sanki toy büsat,
Dözmək olmaz, əgər ümid olmasa.

Tez yananlar demə tezdə kül olar,
İki sevənin qəlbləri bir olar.
Biri bülbül, biri yanan gül olar,
Dözmək olmaz, əgər ümid olmasa.

Fürsət düşər, elə səni yar danar,
Vüsaltək qəlbin alovsuz yanar.
Can həsrətə demə dözər, dayanar,
Dözmək olmaz, əgər ümid olmasa...