Məni aldatmisan saxta eşq ilə,
Soyumuş qəlbinə məlhəm olmuşam.
Özüm dərdlərimlə yandığım halda
Sənin dərdlərinə həmdəm olmuşam.

Ruhuma yol tapan bu dərdi sərin,
Yarası dərindi gör necə dərin,
Çəkdiyim zillətdən varmı xəbərin?
Gecələr yanağı mən nəm olmuşam.

Könlümün loğmanı seçildin əlbət,
Bəs niyə bu qəlbi eylədin qarət,
Daha dərmanından olmaz şəfaət,
İçib eşqin meyin mən dəm olmuşam.

Sevgilim demişdim sənə ürəkdən,
Ətrini istədim əsən küləkdən,
Dəstələr bağladın güldən çiçəkdən,
Güllərin üstündə şəbnəm olmuşam.

Vüsal, demə ki onsuz dünya dar,
Səpmə saçlarına vaxtsız bəyaz qar.
Məgər bundan ağır bir dərdinmi var,
Sevinci unudub dərd qəm olmuşam.