AXTARMA MƏNI..

Mən bir az özüməm,bir az sənmişəm,
Bəxtə yenilmişəm,ruhu yenmişəm.
Yonub düşüncəmi itilənmişəm,
Kor olan bıçaqda axtarma məni.
..
Boşalda bilmədim,doldu deyəsən,
Sağımı unudan soldu deyəsən.
Gülüm,istədiyin oldu ,deyəsən
Olmaz olacaqda axtarma məni.
..
Bir nəğməm var idi,o da oxunmur,
Sevdam bu bədənə nədən sığınmır?
Çoxdandır sinəmə sinə toxunmur,
Gəl,özgə qucaqda axtarma məni.
..
Nə zaman tanıdım,nə dəki,müddət,
Bir yanım qorxulu,bir yanım şiddət.
Sən görən deyiləm,böyüdüm,əlbət.
Hər tində,bucaqda axtarma məni.
..
Bu yerdə göylərin azdı dumanı,
Bəlkə qovuşmağın gəldi zamanı,
Mənim son mənzilim Allahın yanı,
Hər pirdə,ocaqda axtarma məni.

İQBAL NEHMET