Qüssə kədər məni seçmiş,
Bağrım başın dəlib keçmiş,
İlac kimi ürək içmiş,
Vurulubdur o bir yada
Aman Allah sən çat dada.

Od alovsuz elə yandım,
Şirin candan lap usandım,
Düşmənimi dostum sandım,
Daşı vurdu başa o da
Aman Allah sən çat dada.

Ürək boş bir saray onsuz,
Nə səs var nə haray onsuz,
Bu sevda əlçatmaz sonsuz,
Yaman saldı məni oda
Aman Allah sən çat dada.

Göz yaşlarım saldı cığır,
Arzu, istək məni boğur,
Vəfasızlar məni yorur,
Cox uzaqda deyil qada
Aman Allah sən çat dada.

Dərd çəkirəm fağır-fağır,
Gözlərimdən kədər yağır,
Yarsız qalmaq mənə ağır,
Yarım verib məni bada
Aman Allah sən çat dada.

Yarım məni atdı nədən,
Tənha qaldı bu ruh bədən,
Nə gələn var nə də gedən,
Bir mənəm bir yaşıl ada
Aman Allah sən çat dada

Döndü yarın üzü məndən,
Əğyar ilə getdi gendən,
Silənmirəm mən qəlbimdən,
Ümüdlərim düşdü oda
Aman Allah sən çat dada.

Onsuz qapım bağlı qalar,
Hicran gəlib oda salar,
Sevən qəlbim tənha yanar,
Dilim gəlməz desin vida
Aman Allah sən çat dada.

Bir mənəm tək, bir dörd divar,
Əhdən dönən namərd olar,
Sən olmasan ürək donar,
Deməzdim mən bunu yada
Aman Allah sən çat dada.

Vüsal, arzun puç olubdur,
Həvəslərin yorulubdur,
Nəfəsində boğulubdur,
Yetişən yox lal fəryada
Aman Allah sən çat dada.