Bax və gör...

Gizlənib canavar ulamasından,
İt olub dalımca hürənlərə bax.
Ot, alaq bitirib şəhid məzarı,
Qarabağ!Qarabağ! deyənlərə bax!

Səhər açılacaq qızaracaq dan,
Gecə düşündüyüm çıxacaq yaddan,
İllərdi döydüyüm bağlı qapıdan,
Hər gün çıxanlara, girənlərə bax.

Ölür, qeyrətini satır çoxusu,
Boğulur,dənizdə batır çoxusu,
Zibil yeşiyində yatır çoxusu, .
Zadəgan həyatı sürənlərə bax.

Bu qəbir sənindir qazma deyirlər,
İti get döngədə azma deyirlər,
Sus adam,qorx bir az, yazma deyirlər,
Allahım, başıma gələnlərə bax.

Ay İqbal, deyirlər yaman balasan,
Ötələr, keçələr yolda qalasan,
Bir qarış qalmadı namaz qılasan,
Yurdu hasar-hasar bölənlərə bax.

Iqbal Nehmet