(Şərəfli məmurlara aid deyil)
MƏMURUN

Pisi yaxşı etdik,yaxşı deyərək,
Keçdik qapısından başı əyərək,
Rüşvəti veririk gülümsəyərək,
O üzdən uzundu dili məmurun.

Olmayan abırı arına verir,
Yediyin, içdiyin qarına verir,
Xəlvət saxladığı yarına verir,
Yaxında çıxacaq yeli məmurun.

Çiy yeyir ətini qoymayır bişə,
On versən qaytarır,dayanmır beşə,
Qabağa əyilir başı həmişə,
Arxaya daranır teli məmurun.

Adamın yoxdusa eləməz qəbul,
Sən onun gözündə dilənçi, ya qul,
Onun Vətəni də,itəni də pul,
Düzəlməz,əyridir əli məmurun.

Oyanıb ayağa duran gələcək,
Rüşvət zəncirini qıran gələcək,
Ortaya müqəddəs Quran gələcək,
O gün qırılacaq beli məmurun.

Iqbal Nehmet (yeni)