Bu şəhərə qış gəlib, qar örtüb küçələri....
yolarda izlər itib zülmətdir gecələri...
işığını kəsiblər günəşi qəfəsdədir,
Yatağında görüblər elə bil can üstədir.

Yağışlar da kinlidir göydən yerə sərt yağır...
Bu şəhərin gözündən küçələrə dərt yağır....
Əlləri buz bağlayıb, ayaqları yerimir
Anasız yetim təki hey ağlayır kirimir...

Üst başı toz dumandır külək yumur üzünü,
Bu şəhərdə əyri çox tapmaq olmur düzünü.
Baş çəkən də başını İtirir bu şəhərdə,
Yaş üstünə yaşını gətirir bu şəhərdə.

Əlində qəm qədəhi ölüm içir bu şəhər
İnsaf əkib yerinə zülüm biçir bu şəhər.
Əcələ can paylayır torpaq geyib əyninə
Neçə yerdən çartlayır, quraq geyib əyninə

Üz gözündə yağışlar qırışlarla yol gəlir,
Kif qoxuyan divarlar bədənində dincəlir
mənzillərdə işıq yox, yoxa çıxıb kölgələr,
Bu şəhəri tərk edən bir də çətin ki dönər...