Deyirəm ürəkdən süzülüb gələn,
Dildə şəkər olan söz, nə gözəldi.
Qara qaş altında yarına baxıb,
Naz ilə süzülən göz, nə gözəldi.

Qap qara tellərdə, qızıldan daraq,
Sevda yollarına nur saçan çıraq.
Aşiqə sevgili yarından soraq,
Xoş xəbər gətirən iz, nə gözəldi.

Bu eşqi, istəyi yaratdın məndə,
Oldun mənim üçün ən əziz bəndə.
Üz - üzə gələndə görürəm səndə,
Sevinən qəlb, gülən üz, nə gözəldi.

Sevib sevilənlər düşünsün dərin,
Sevsin, aldatmasın amma bir birin.
Yalan nəyə  lazım, olsa da şirin,
Acı olsa belə düz, nə gözəldi.

Ürəklər bir eşqçün atırsa hər an,
Hakim ola bilməz o qəlbə yalan.
Qəfl qığılcımdan alışıb yanan,
Sönmüş ocaq altda köz, nə gözəldi.

Həsrət özün yorub eyləməsin qəsd,
Sən əkən güllərdən bağlayanda dəst.
Ruhum qidalanır cismim olur məst
Süz eçqin wərabın, süz, nə gözəldi.

Bülbül nalə çəkər gül açsın deyə,
Layla körpəyçündü dil açsın deye.
Yalnız yaradana əl açsın deyə,
Torpağa əyilən diz, nə gözəldi.

Daha nə gözümüz acı yaş tökür,
Nə də qəddimizi intizar bükür.
Bu günə çox şükür, gülüm, çox şükür,
Sevib sevilirik biz, nə gözəldi.

Vüsal, nə dəqiqə, nə də gün sayaq,
Lazımsa illəri ilə calayaq.
Əllini, altmışı arxada qoyaq,
Yaşayaq bir yerdə yüz, nə gözəldi.