Gəlmişəm dünyaya əlim ətəkdə,
Eşqimin şirəsi, qalıb pətəkdə.
Yaşasam dünyanı qoşa da , tək də,
Dünən də beləydim, bu gün də belə.

Hələ cavanlıqdan əzab çəkmişəm,
Peşiman olmuşam, qan yaş tökmüşəm.
Sevginin yolunda dizi bükmüşəm,
Dünən də beləydim, bu gün də belə.

İtib məhəbbetim, qalmışam bekar,
Çox sirrlər görmüşəm açıq aşikar.
Susduqca olmuşam, yenə günahkar,
Dünənde beləydim, bu gün də belə.

De niyə aldandım yalan sevdaya,
Efi ilan kimi çalan sevdaya.
Ağlımı başımdan alan sevdaya,
Dünən də beləydim, bu gün də belə.

Demə getdi qatar çətin çataram,
Əzablı yollarda itib bataram.
Uzatsan əlini yenə tutaram,
Dünən də beləydim, bu gün də belə.

Tac etdim qüruru başımda hər an,
Qəlbdə Allah eşqi, əlimdə quran.
Boş bir xəyal qaldı tək mənə qalan,
Dünən də beləydim, bu gün də belə.

Sevgi bir cənnətdir haqqdan gələnə,
Can fəda etmişəm qədir bilənə.
Eşqdə meyil saldım inam, güvənə,
Dünən də beləydim, bu gün də belə.