Qanadı qırılmış bir qartal kimi
Çırpınıb göylərdə uça bilmirəm
Atamla əl-ələ keçdiyim yolu
Mən indi atasız qaça bilmirəm


Bu ata həsrəti öldürür məni
Əcəlim bəlkədə belə öldürməz
Yuxuma gələndə güldürür məni
Dünyalar gəlsədə belə güldürməz


Atadır həmişə övlada dayaq
Hardadır bəs mənim arxam,dayağım?
Atasız bacarmır büdrəyir ayaq
Necə ki büdrəyir mənim ayağım


Bu qarlı boranlı soyuq dünyada
Günəşli baharım yayımdı ata
Həyatda hər paydan alsamda bir pay
Mənim tək əl çatmaz payımdı ata


Atasız dünyamın çırağı sönüb
Qorxudur bu zülmət qaranlıq məni
Atasız bu dünya aslana dönüb
Hərdən şikar sanır biranlıq məni