Qaçdım "yazılmış" qismətdən,
Aranıram cinayətdən.
Qopmuşam bu planetdən,
Bəri gəl, yapışım sənə.

İnsan olmaq qəbahətin,
Çəkirəm zülmün, zillətin,
Mənə mənlə olmaq çətin,
Əriyim qarışım sənə.

Nifrət ruhuma daraşıb,
Çökürəm, beynim qarışıb..
Bir az daha insanlaşıb,
Yaranım, yaraşım sənə.

Yaxın gəl, yaxın adamım,
Ruhumdan qorxan adamım.
Ömrümə çıxan adamım,
Sarılım, sarmaşım sənə.