Mənim sənə səndən şikayətim var,
Dinlə bu qəlbimin səsini dinlə.
Axı bir zamanlar belə deyildin,
Necə xoşbəxt idim mən də səninlə.

Ovlayıb könlümü cismimdən mənim,
Dağıtdın yuxumu, de nə qazandın?
Bilirdin yaralar vardı sinəmdə,
Kor qoydun ruhumu, de nə qazandın?


Hələ də səslənir qulaqlarımda,
O yalan sözlərin o yalan andın.
Mən ki bu sevdaya ürək qoyurdum,
Sən məni..Sen məni axı nə sandın?

Gizli yazışmalar o gizli zənglər,
Bunu hiss edirdim bunu duyurdum.
Sənin günahını hər gün ağlayıb,
Mən bu göz yaşımla silib-yuyurdum.

Sənin qürur deyib gözə soxduğun,
Bəhanə olduğun açıq göstərir.
Cürbəcür məkanda izin görünür,
Qürurun buna bəs necə yol verir.

Səni qınayacaq saçındakı dən,
Ağaran başından utan deyəcək.
Hər gün təvəllüdün qarşına çıxıb,
Barı bu yaşından utan deyəcək.

Fəqət,bəs qazancın axı nə oldu,
Sevgini payladın özünü yordun.
Məni dərdə qəmə ortaq eyləyib,
Nə bir xəbər aldın halımı sordun.

Vicdanın haçansa açar gözünü,
Onda anlayarsan bilərsən məni.
İnsafən bir düşün doğru dürüst ol,
Mənim tək kim sevdi, kim sevdi səni.

Sən nə qazandınsa bilə bilmirəm,
Mənim qazandığım göz yaşı oldu.
Gözümü yumuram ölə bilmirəm,
Adım xəyanətin yoldaşı oldu.