Tənha bulud kimi dolmuşam yenə,
Ağrımı ,acımı yeller üşüdür.
Ürəyim ağlayır yanıq saz kimi,
Mizrabın ahını tellər üşüdür.

Könüldən asılı qalıb qəm daşım,
Аglımın dərdinə dözməyir başım,
Dəryanı daşdırır acı göz yaşım,
Bəbəyi çağlayan sellər üşüdür.

Bir sevgi  tapmışdım, sevda bağında,
Fərağım dil açır can yarpağında.
Güman tül toxuyur, ömür dağında,
Zamanı səhv salan  illər üşüdür.

Basıbdır bagrına qəm, kədər məni,
Ovudur qismətim, kəm qədər məni.
Atır dəryasından ləpələr məni,
Ruhumun çırağın cöllər üşüdür.

Ay Vüsal almısan sağalmaz yara,
Çəkir bu əzablar səni hey dara,
Demə sahibsənmiş dərd adlı vara,
Nisgili, hicranı dillər üşüdür.