Bu gün eşitdim ki...
( İlkin Abbas )

Bu gün eşitdim ki, ailə qurursan,
Yad ürək, yad ocaq olur məskənin.
Ağa bürünmüsən, gəlin köçürsən,
Xonçalar düzülüb qapında sənin.

Bu gün eşitdim ki, bu acı qismət,
Alır əllərimdən ömürlük səni.
Sevən bir ürəyi ikiyə bölmək,
Özün de, bu qədər asandır yəni?

Bu gün eşitdim ki, hansısa oğlan,
Elçisin göndərib, anan "hə" deyib.
Həmin "hə" sözünü eşidən zaman,
Bəs sevən ürəyin söylə, nə deyib?

Bu gün eşitdim ki, xoşbəxt günündür,
Sağlıqlar deyilir adına sənin.
İndi könül verib getdiyin insan,
Məntək yanacaqmı oduna sənin?

Bu gün eşitdim ki, daha alınmaz,
Bir vaxt uca olan məhəbbətimiz.
Sən demə əzəldən ayrı yazılıb,
Yazan tərəfindən bəxt-qismətimiz.

Bu gün eşitdim ki, eşqin dadını,
Mənlə yox, özgəylə sən dadacaqsan.
Körpə xəyalları, körpə hissləri
Elə o adama yaşadacaqsan.

Daha danışmağa qalmadı sözüm,
Özümü boğdu bu eşq adlı dəniz.
Sən başqa mənzili yandıran çıraq,
Ayrı dünyaların insanıyıq biz...

Bu gün eşitdim ki, ailə qurursan,
Yad ürək, yad ocaq olur məskənin.
Ağa bürünmüsən, gəlin köçürsən,
Xonçalar düzülüb qapında sənin.