Sevgidən yazıram ürəyim dolu,
Ruhum saf bildiyim bir eşqin qulu.
Keçir ürəyimdən sevdanın yolu,
Ayağım izimdə böyüyür mənim.

Bəlkə də səmadan düşüb pay gəlib,
Ureyi böyüyüb, bağrini dəlib.
Sevən ürəyimə, kim dəyər verib,
Həsrətim özümdə böyüyüb mənim.

Zaman da işləmir çəkir cilovu,
Hicran qara saça səpir qırovu.
Yaxır qəlbinizi həsrət alovu,
Ocağım közümdə böyüyür mənim.

Bəxtim əvvəlcədən yazılıb qara,
Yaralı ürəyə olmadı çara.
Həsrət varlığımı çəkdikcə dara,
Sevgisi gözümdə böyüyür mənim.

Deyirlər sevənin gözləri yaşdır,
Ahından çatlayan ürək, yox, daşdır,
Məhəbbət deylir yaman qarğışdır,
Naləsi üzümdə böyüyür mənim.

Qırılmış qəlblərdən, söz açan eşqin,
Ürəkdən ürəyə iz açan eşqin.
Qəlbimdə dünyaya göz açan eşqin,
Laylası dizimdə böyüyür mənim.

Zaman tələsərək sürətlə getdi,
Payız gizlənincə qış ''dada yetdi''.
Üşüyən ruhum da şaxtada itdi,
Ümüdüm dözümdə böyüyür mənim.