Dünən səhf etdik ayrıldıq, bu gün çəkirik intizar,
Beynimizdə xəyal, fikir, ürəyimizdə dərd qübar,
Tək biz ikimiz qəmliyik, qalan hər kəsdə sevinc var,
Hansı yana nəzər salsaq, bu gün çal-çağır, şənliydi
Heyiflər olsun ki, bircə, nə sənliydi, nə mənliydi.

Günah bizim özümüzün, belə yazmamışdı yazan,
Tələsdik vüsala yetək, olduq düzgün yolu azan,
Eşqin bağında səhf saldıq, gördük çovğun, boran, xəzan,
Halbuki eşqin bağında hər yan güllük, çəmənliydi
Heyiflər olsun ki, bircə, nə sənliydi, nə mənliydi.

Eşqə xəyanət eylədik, bilmədik edirik günah,
Bilmədik ki, peşmançılıq çəkəcəyik bu gün, sabah,
Məhəbbəti insanlara bəxş eyləyib böyük Allah,
Kişiçündə, qadınçündə, vəfadarlıq ərənliydi
Heyiflər olsun ki, bircə, nə sənliydi, nə mənliydi.

Sənin adın dilimdədi, mənim adım dilindədi,
Qovuşmaqçün sənə, mənə, maneçilik edən nədi?
Məsəldirki hər bir kəsin, taleyi öz əlindədi,
Bizim qoşa taleyimiz, çətin həll olan tənliydi
Heyiflər olsunki, bircə, nə sənliydi, nə mənliydi.