*** Mənimlə ***

Kaş ki,bizi yoğuran bir yenidən yoğura,
Bir də düşək uşaqkən düşdüyümüz cığıra,
Yenə yaşlı bir kişi "Dondurma var" çığıra,
Dəli kimi oynaya,uşaq kimi bağıra...
Bilərsənmi mənimlə ? ...

Tanrı çəkdi bizə dərd cədvəli qəhqəhəylə,
Düzəltdi gildən insan heykəli qəhqəhəylə,
Həm sonu qəhqəhəylə,əvvəlli qəhqəhəylə,
Üsyan edib bu dərdə bir dəli qəhqəhəylə,
Gülərsənmi mənimlə ?...

Bəs deyincə çəkmişik bu gərdişin nazını,
Çox verəndə çoxunu,az verəndə azını,
Şaxta,boran vurmamış ömrümüzün yazını,
Ümidlərlə siləndə tale yazan yazını...
Silərsənmi mənimlə ?...

Arzular incə-incə,qəlbə vurur bəzəklər,
Solmayaydı çiçəklər,sınmayaydı ürəklər,
Söylə,sənə arzumu çatdıranda küləklər,
Sən də gözəl arzular,sən də ülvi diləklər...
Dilərsənmi mənimlə ?...

Bəlkə min il sonra bir şair sözündə gəzdim,
Bəlkə dönüb şəbnəmə,qönçə üzündə gəzdim,
Bəlkə dönüb sən oldum,sənin özündə gəzdim,
Bəlkə dəli bir eşqin düşdüm izində gəzdim...
Gələrsənmi mənimlə ?...

Son bir gecə qalanda,son açılan səhəri,
Deyilməmiş min sözün əvəzi bir nəzəri,
Gözdən axan son yaşı,son bir udum qəhəri,
Son bir içim sevinci,son bir tikə kədəri...
Bölərsənmi mənimlə ?...

Təkcə bu gündür bizim,başqa nə var sualdır,
Dünənimiz xatirə,sabahımız xəyaldır,
Bəlkə bu an etiraf etməyə son macaldır,
Fərz et həyat ayrılıq,fərz et ölüm vüsaldır...
Ölərsənmi mənimlə ?...

Müəllif ...Ramin Həsənov...