Bu gün yolum düşdü qəbristanlığa,
Seyr etdim müxtəlif məzar daşların.
Neçəsi həyatda xoş gün görməyib,
Yalandan çəkiblər xoş baxışların.
Bir qadın gördüm ki, o sağlığında,
Bir çiçək almayıb öz yoldaşından,
İndi məzarının üstü gül, çiçək,
Özü gülüb baxır, məzar daşından.
Biri ömür boyu yamanlıq edib,
Daşına cənnəti əks etdiriblər.
Birisi o qədər xeyirxah idi,
Yazığa daşı da, artıq görüblər.
Biri övladından xeyir görməyib,
Baxımsız qalmaqla köçüb dünyadan.
Amma məzarına baxan söyləyər,
Dünyanın xoşbəxti olub bu insan.
Daşlara baxırsan yarış meydanı,
Elə bil sərgiyə çıxıb qəbirlər.
Axı kim bilir ki, o daş altında,
Onlar necədirlər, nə gün görürlər?