Uzaqlaşıb, danışmırsan nədəndir?
Necə səni mən tay tutum lallara?
İntizardan rəngim solub görmürsən,
Lağ edirsən məndə olan hallara.

Bir kimsəm yox, bu dərdimi araya,
Təbib tapa bu sağalmaz yaraya.
Soyuqluğun buz yağdırır araya,
Dözüm yoxdur belə qeylü qallara.

Barmaqlarım iz salmışdı telində,
Əllərinə həsrət qalan əlim də,
Bərk yapışıb bəlkə başqa birində.
Çarpaz vurub uzatdığım qollara.

Bu sevdada qovrulduqca ürəyim,
Vüsal deyir, bircə sənsən gərəyim.
Gözlərimdə susan, arzu diləyim
Göz yaşımla səpələnir yollara.