Həsrətin durub qəsdimə,
Gecə gündüz əzir məni.
Əlindən gəlmişəm zara,
Hara getsəm, gəzir məni.

Hicranımı bilə bilə,
Zülm edirsən gülə - gülə.
Gəl düzünü qəbul elə,
Sandın nəfsə nəzir məni.

Damarda durmur qanım da,
Qalmayıbdır can canımda.
Çoxdan yoxsan sən yanımda,
Yadlar tənə süzür məni.

İstəmirəm sirri açam,
Hər kəlməmə deyirdin can.
De səsin gələcək haçan?
Gözlətməyin üzür məni

Hər görüşdə bir amalın,
"Bircə məni razı salın"-
-Belə tərzin belə halın,
Bıçaq kimi kəsir məni.