Şümşad boylu, gül yanaqlı gözəlim,
Ürkək baxışında adını gördüm!
Şəlalə zülfünə çatmadı əlim, Əridim - hicranın odunu gördüm.
*
Gülüşün ağlımı başımdan aldı,
Ötkəm xəyalıma bir lərzə saldı.
Zillətin zənciri boynumda qaldı...
Lal oldum, lallığın vədini gördüm.
*
Ən əziz bir gündə sındı qanadım,
Yazıldı bəxtimə yay-oxla adım.
Ağladım, sinəndən qopdu fəryadım,
Ruhumun dostunu, yadını gördüm.
*
Möhnət sevincimi yelə yüklədi,
Əhdin duz daşını belə yüklədi.
Naləmi ürəkdən dilə yüklədi, İnsanam, sevginin dadını gördüm!