Yaz gəlir, gül taxır Yurd sinəsinə!
Bu güllü bayramın mübarək, Ana!
Nə deyim, nə dilək diləyim sənə,
Yaraşsın hüsnünə ağbirçək Ana!
*
Gözümdə nurun var, nəğməmdə laylan,
Hər ana deyəndə can demisən, can.
Dilimə dad verən dilinə qurban!
Can deyə bilirəm sənin tək, Ana!
*
"Day dur, dayın gəlsin"-dedin, dikəldim,
"Böyü, toyun gəlsin", budur, yekəldim!
"Nəvə payım gəlsin", mən özüm gəldim,
Darıxma, payın da gələcək, Ana!
*
Gəlişim gurultu, gedişim sükut,
Sürünür arxamca bir baxış bulud...
Qüssəni yelə ver, kədəri unut,
Nə ağrı-acı gör, nə qəm çək, Ana!
*
Qoy enim səcdənə, and içim sənə,
Öpüm birçəyindən mən dönə-dönə.
Sən verdin qələmi, ilhamı mənə,
Hədiyyən ömrümə bər-bəzək, Ana!