Zirvə qarı almaz qaşdı hər dağa,
Əymə qəddi, dağ tufana əyilməz!
Kür oğlusan, kükrə Kür tək, ay ata!
Ər kişisən, ər hicrana əyilməz!
*
Ruhum küsür şəklini hər görəndə,
İstəyirəm yeri-göyü titrədim.
Yeniyetmə bir cavansan, çöhrəndə
Yuva salıb dünya boyda həsrətim.
*
Əyilməzəm, əyilirəm önündə,
Zil qaradı, bəxtin kimi, gözlərim!
Ata kimi yaşasam da evində,
Körpə kimi gəlişini gözlərəm.
*
İllər bizi ayrı saldı əzəldən,
Rastlaşaydıq, kam alaydı ürəyim!
Sənsizliyi miras qoydun bizə sən,
Axı belə mirası mən neyləyim?
*
Mən nə deyim bu dövrana, bu hala?
İşə bir bax: mən toxtamış, sən cavan.
Rahatlığım yetim qalıb, çalxala!
Zaman dönsün, dövran çıxsın oxundan!
*
Alaq biz də kamımızı, atacan!
Ulduz olaq, kəhkəşanlar doğulsun!
Rüsvay edək, şəri qovaq dünyadan,
İtgin salaq, haqqa heykəl qoyulsun