Aldanma böhtana, uyma yalana,
Dünyada saf ada sandı, Müəllim.
Qoyma xırdalana, qıyma talana,
Vicdandı, şərəfdi, şandı, Müəllim.
*
Qeyrətdi, qüdrətdi, qoldu, qüvvətdi,
Aqildi, kamildi, ulu hörmətdi.
Əzizdi, təmizdi, ülvi niyyətdi,
Haqq dolu, baxt dolu camdı, Müəllim.
*
Düz adı ustadı, biləndi, başdı,
Rəssamdı, şairdi, heykəltəraşdı.
İnamsız, ilhamsız yaşamamışdır,
Nahaqda naşıdı, xamdı, Müəllim.
*
Qürurdu, məğrurdu, əyilməz dağdı,
Şirindi, sərindi, büllur bulaqdı.
Ülfətdi, hikmətdi, sirdi, soraqdı,
Başından alışan şamdı, Müəllim.
*
Qayğıdı, duyğudu, ilıq nəfəsdi,
Arzudu, ruzudu, ömürlük bəsdi,
İlkindi, yelkəndi, səsdi, həvəsdi,
Bülövdü, bütövdü, tamdı, Müəllim.