Dayan, insaf elə, yandırma belə,
Amandı, odlandı şair ürəyi!
Bir az asta tərpən, duymaq istəsən,
Oyandı, vulkandı şair ürəyi!
*
Tutuldu, buluddu, duruldu, bulaq,
Duyuldu, uludu, buyruldu, uşaq,
Vuruldu, büllurdu, qırıldı, budaq,
Talandı, virandı şair ürəyi!
*
Sükutun süqutu, eşqin vücudu,
Dünyanı duyanın haqqa umudu.
Hiddətin, nifrətin həddi, hüdudu,
Divandı, Vicdandı şair ürəyi!
*
Hikmətə açardı, həyata müştaq,
Dinməsə bezardı, duymasan, dustaq.
Töhmətə düçardı, ağrıya qundaq,
Qınandı, yanandı şair ürəyi!
*
Güldüsə, bahardı, küsdü, qurtardı!
Hər sözü nübardı, bir şirin bardı.
Vüsalı qopardı, aldı, apardı,
Çalxandı, ümmandı şair ürəyi!