Saç könül zinətini, parla, alış, yan beləcə!
Gəl deyək yurdumuzun şəninə dastan, beləcə.
*
Haqqı bayraq eləyib, sülhə könül bağlamışıq,
Veririk fitnələrin qətlinə fərman, beləcə.
*
Bizə pənah gətirir, çarəsizdi, bədxahımız,
Tutur övladi-vətən şər işə divan, beləcə.
*
Daş üstə gül bitirər, ana təbiət, istəsə,
Doğdu Kəpəzim üçün Göy Gölü canan, beləcə.
*
Mənbilən, qalmayacaq yer üzündə həsrət, inan,
Çatacaq Şah Dağına dərdli Savalan, beləcə.
*
Sabahı al-qırmızı bəxtəvər övladımızın,
Xoş keçir günü-gündən ömrü firavan, beləcə.
*
Hər gələn bir gül əksə, cilvələnər baği-vətən,
Vüsal, cənnətə dönər Azərbaycan, beləcə.