Nə ola, tale verə, bir də belə şanım ola!
Ömrümü yaşamağa dübarə imkanım ola!
*
Aləmə göstərərəm ilhamımın qüdrətini,
Xoş sözüm, xoş avazım, bir də tar-kamanım ola!
*
Azalıb dadı-duzu musiqi məclisimizin,
Dədə Füzuli kimi bircə qəzəlxanım ola!
*
Açaram, faş elərəm iç üzünü saxtakarın,
Nurlu niyyət siminə köklənən lisanım ola!
*
Məni məftun edə kaş, sevgili canan yenə də,
Könlümün həmdəmi öz gözləri ceyranım ola!
*
Çəkərəm qəm yükünü, dünyanı azad edərəm,
Hər yana işləyəcək nur dolu fərmanım ola!
*
Söz-sənət məclisinə cəm ola ölkələr, Vüsal,
Məclisin ağsaqqalı Azərbaycanım ola!