Bir könül ki, od ala, şölələnə, mən nə deyim?
Göz kədər fırçasıyla sürmələnə, mən nə deyim?
*
Bir iş ki, əzəlindən düyün düşə, gəlməyə düz,
Taleyi, bəxti, işi köndələnə, mən nə deyim?
*
Hər ürək dünyamıza bir yeni sevda gətirər,
Qəlbinin eşq övladı tərs gələnə, mən nə deyim?
*
Yar yarın istəyini nakam qoysa, bilə-bilə,
Ar udub, gözlərindən od silənə, mən nə deyim?
*
Çox zaman yaxşı pisə, haqq nahaqqa qismət olur,
Qismətim belə imiş, pay bölənə, mən nə deyim?
*
Könlümü qoydu viran, qıymadı, talan elədi,
Sirr sözüm açıq-aşkar, hər gələnə mən nə deyim?
*
Vüsalın minnətini almadı, ta bilsin özü,
Sözümü lağa qoyub, de, gülənə, mən nə deyim?