Sevgilim, səbr elə bir, gör hələ nələr olacaq!
Eşqimiz, ilqarımız dillərdə əzbər olacaq!
*
Qoymaram adımıza zərrə xələl gələ, inan,
Əhdimiz ən müqəddəs anda bərabər olacaq.
*
Bizə qibtə eləyən xain ürəklər, bilirəm,
Paxıllıq caynağında canından bezar olacaq.
*
Alacaq övladımız kamını, Vətən uludur,
Yurdumuz yer üzündə pisliyə çəpər olacaq.
*
Heç kəsin qismətinə göz dikməyib millətimiz,
Bizə əl qaldıranın özü dərbədər olacaq.
*
Dünyamız ağ geyəcək, bəxtəvər gəlin misalı,
Hər tərəf yavaş-yavaş dönüb çəmənzar olacaq.
*
Çəkəcək şər əlini insanlığın işlərindən,
Vüsalın bu sözünə hamı tərəfdar olacaq.