Çörək - ulumuzun ruzusu, ruhu,
Basılmaz andımız, ilqarımızdı.
Çörək, ana südü, hava, bir də su,
İşıqlı dünyada ilk varımızdı.
*
Çörək - nəğməmizin əzəli, ilki,
Çörək - qüvvətimiz, qüdrətimizdi!
Çörək adicə bir nemət deyil ki!
Çörək - namusumuz, qeyrətimizdi!
*
Çörəyə tapınıb babalar darda,
Qılınc kəsməyəni, çörək kəsibdi!
Min illik etibar yaşayır, harda
Babalar bir tikə çörək kəsibdi!
*
Çörək - üz ağlığı, baş ucalığı,
Çörək kişiliyin meyarı kimi.
Çörək - qədirsizə - qarın toxluğu,
Namərdə, nankora əl kiri kimi.
*
Ayağa duranda çörək tapdayıb,
Çörəyi dizinin üstə olanlar.
Çörəyə qıymayıb, gözünə qıyıb,
Çörəyi gözünün üstə qoyanlar.
*
Çörəyin qədrini ucuz tutanlar,
Həsrət qalasıdı çörək üzünə.
Çörəyə cürbəcür haram qatanlar,
Gərək yer tapmasın Yerdə özünə!
*
Çörək - ana südü, körpə gülüşü,
Çörək balaların boy artımıdı!
Çörək - hər millətin müqəddəs işi,
Çörək hər bir xalqın say artımıdı.