DARIXARSAN...
*******
Həsrətli gecələrin qəm gətirən çağında
Eşq oduna canını yaxarsan... darıxarsan.
Qucaqlayıb dizini sakitcə otağında
Qaranlığa baxarsan...baxarsan...darıxarsan...
*******
Gözlərini yumarsan-o, görünər gözünə,
Danışarsan onunla-cavab verməz sözünə.
Bəzən dönüb yağışa yağarsan yer üzünə,
Bəzən də şimşək olub çaxarsan... darıxarsan...
*******
Dərd dilləndirər səni, nə dastanlar qoşarsan,
Yazdığın hər sətirdə əngəlləri aşarsan.
Gah ümmantək çağlayıb dalğalartək coşarsan,
Gah da sakit çay kimi axarsan... darıxarsan...
*******
Bəlkə də bu darıxmaq qüvvət verər eşqinə,
Bəlkə də bir səbəbdir inanmağa sevginə.
"Gözləyim...bir gün gələr..." deyib sevən qəlbinə
Sancaqlayıb bir ümid taxarsan... darıxarsan...
*******
Sevil Məmmədova