Gəldim, gəlişimdən heç isinmədin,
Getsəm üşüdərmi gedişim səni?
Mənmi soyumuşam, sənmi, bilmirəm,
Öpsəm isidərmi öpüşüm səni?


Ötənlər sənə də, mənə də birdi,
Nə soyuq əldi bu, araya girdi?
Bu necə sehirdi, bu necə sirdi?
Kim yoldan elədi, söylə, kim səni?


Olan can odumuz elə buydumu?
Bir şimşək ömrüdü, bircə qıydı bu!
Necə sevgidi bu, necə paydı bu?
A nur yağışında, görüm, çim, səni!


Budur, bu işim də belə, yarımçıq,
Gəl indi, kişisən, ömrü başa çıx!
Ağlım dumanlıdı, ürəyim açıq
Hürküdüb qaçırtdı hansı cin, səni?


İnanma, bu dərdə dözənəmmi mən?
Didərgin düşmüşəm dərdin əlindən!
Daha kömək yoxdu yoxsul dilimdən,
Nə ola, qaytara bu him-cim səni!