Bahar buludları gözünü sıxsa,
İnci göz yaşından çöl inciyərmi?
Rüzgar sığal versə pərişan telə,
Dağların mehindən tel inciyərmi?


Əsir şeyda bülbül dözüb fərağa,
Qönçənin eşqiylə qonsa budağa;
İsitmə göndərsə dodaq dodağa,
Qəlbin istəyindən dil inciyərmi?


Əmib dağ çiçəyi sevda şehindən,
Məst olsa səhərin sərin mehindən;
Balçəkən mey içsə gül qədəhindən,
Eşqin şərbətindən gül inciyərmi?


Lal olsa heyrətdən çılğın şəlalə,
Əriyər, üzülər gül üstə jalə.
Sədaqət rəmzi tək dolsa piyalə,
Əyilib almağa əl inciyərmi?


Naləli bir dilə nəğmə calansa,
Sevginin hökmüylə giley talansa;
İşdir, kəmər olub belə dolansa,
Zülfün qucmağından bel inciyərmi?


Kədərin belini dəyanət qırsa,
Etibar ürəkdə şah tək otursa;
Çən-duman göl üstə xəyaldadırsa,
Mehin gəlişindən göl inciyərmi?


Əhdinə sadiqsə sevənlər əgər,
Sürünən şayələr ona neyləyər?
Vüsal, həsrətiylə yandığın dilbər,
Naz ilə sallansa, yol inciyərmi?