Sinəm - cıdır düzü, at çapır hicran,
Ayrılmamışıq da deyəm, yeri var.
Həsrət qəh-qəh çəkir, vüsalsa giryan,
Qəlbimin nə boyda dərdi-səri var!


Bilirəm, od tutub alışsam əgər,
Yanarsan halıma sən məndən betər.
Nəmli həsrətimi kipriyinə sər,
Axı gözlərində atəş yeri var!


Vüsalam, sinəmdə qalmaqaldı, gəl -
Sevincim dərdimi itgin saldı, gəl.
Toy-büsatdı, Gülüm, çalhaçaldı, gəl,
Utancaq eşqimin gör nələri var!