Çəkinmə, sevgilim! Alnı açıq gəz!
Əhdimi, sözümü danmaram, qorxma!
Vüqarım - Şah dağı, eşqim - Bisütun!
Əyilmərəm, qorxma, sınmaram, qorxma!


Qartalam qayadan qanadlanmışam,
Qarlı zirvələri beşik sanmışam.
Bu sevda oduna elə yanmışam,
Yüz boran-qar ola, donmaram, qorxma!


Həyat bir meydandı - ad alasıyam!
Tanrı ətəyindən od alasıyam.
Eşqimin barından dad alasıyam,
Ölərəm, bu yoldan dönmərəm, qorxma!