Zillənən görüb gözümü,
Danlama gəl, daş üzümü.
Çənəmə sıxıb dizimi,
Qına çəkilirəm, Dəniz!

İçim alov saça-saça,
Ürcah oldum sonu puça.
Səndən uçub, qaça-qaça
Sənə tökülürəm, Dəniz!

Həm afətim, həm də sonam,
Sənli-sənsiz bağrı qanam.
Yaxanda allanan danam,
Yenə sökülürəm, Dəniz!

Varım-yoxum pərən-pərən,
Divanəyəm, xəyal hörən.
Oğrunca gərdəyə girən
Çənəm, əkilirəm, Dəniz!

Bağrıbadaş könlüm sənə,
Düşübdü, bir gör, nə günə.
Dadar-doymaz qaldım yenə,
Yanıb-yaxılıram, Dəniz!

Vusal Agayev