Könül can ayrısı, sızlar dəmadəm,
Bir şeyda bülbüləm, gülə möhtacam.
Canımda taqət yox, gözümdə jaləm,
Bir susuz səhrayam, selə möhtacam.


Həsrətim gözümə sığınıb, qalıb,
Fəğanım qəlbimə od-alov salıb;
Gümanım bir şirin yuxuya dalıb,
Xoş keçən aylara, ilə möhtacam.


Eşqin yolçusuyam, yoxuşum durur.
Qəlbimdə min dürlü naxışım durur.
Şəhla gözlərində baxışım durur,
Səyriyən dodağa, dilə möhtacam.

Nəğməyəm, al-əlvan bəmim-zilim var,
Həsrətim, möhnətim, həm nisgilim var.
Allaha şükür ki, şux sevgilim var,
Di gəl, oxşamağa telə möhtacam.