"Öpüş yanığısan"-deyib qınama,
Gülüm, "havam-suyum", düzü, öpüşdü.
Sevgimin vüsala doğru uzanan
Cığırı öpüşdü, izi öpüşdü.


Ayrılıq oduna çox yanıb canım,
Dözməyə qalıbdı bircə gümanım. Aylar həsrətiyəm...
bir də... nə danım,
Eşqimin astarı, üzü öpüşdü.


Bir ildə bir dəfə bir görüş üçün
Yüz dərə-dağ keçib gəlirəm, düşün.
Məhəbbət süfrəsi olan görüşün
Kababı naz-qəmzə, duzu öpüşdü.


Umu yoxsa əgər, bil, küsü olmaz,
Odu olmayanın tüstüsü olmaz.
Öpüşsüz görüşün istisi olmaz,
Vallah, gül dodağın közü öpüşdü.


Əyilsən, dünyada bir eşqə əyil,
Vəfa olan yerdə öpüş ar deyil.
Öpüşlü anların qiymətini bil,
Bil ki, səadətin özü öpüşdü.