DAYANMAZ.

Salam götür, hal-əhval tut, insan oğlu, eloğlu,
Dalğa qovur, yelkənimiz sel ağzında dayanmaz.
Təşrif buyur bu məclisə, söz de, söz al, eloğlu,
Şal yanına qumaş çıxart, yoxsa cında dayanmaz.


Haqqa vurğunsan bilirəm, haqq yolunda gün aydın,
Haqq igidə qüvvət verər, darda qoymaz, bu aydın,
Arzum budur, xislətinlə haqqa heykəl olaydın,
Coşan ilham meydan istər, qəfəs canda dayanmaz.


Ər belindən gələn oğul, ər böyüyər, ər olar,
Mayasına haram düşən müxənnət, bicvər olar.
Özünə tay dost tapmayan tezi-geci xar olar,
Mərdə arxa, bil, namərdin yox zatında, dayanmaz.


Balta öc olmaz odunla, sapı odun olmasa,
Qardaş öc olmaz bacıyla, zatı qadın olmasa.
Mərd igidə yaxın durma, əsil-zatın olmasa,
Namus-qeyrət meydanında qılınc qında dayanmaz.


Xoşrəftar ol mərdə, fəqət üz göstərmə yaltağa,
Qərarında möhkəm dayan, fürsət vermə yaltağa.
Təşnə kimi sarılsa da şehli yamac-yal, dağa,
Dağ ərisə qəm-qüssədən, yal yanında dayanmaz.


Dosta inan, tənha gəzmə, tək aslan da basılar,
Mən nə deyim daha sənə, arifə söz bəs olar.
Sirr qarında, daş dərində qalsa görünməz olar,
Sirr vermə hər cür gədaya, söz ağzında dayanmaz.


Yarıcanam, əzəl gündən budur arzum, muradım,
Uçsam əngin fəzalara, dostlar qolum, qanadım.
Çoxlarını bərkə-boşa salıb, təkrar sınadım,
Canbir dosta canım qurban, darda gendə dayanmaz.