ÖLMƏRƏM.

Mən bir bulaq olub, büllur suyumu
O dümağ sinəndən alsam, ölmərəm.
Kükrəyən qan olub, mən öz yolumu
Sənin ürəyindən salsam, ölmərəm.


Qonsam yanağına qoşa xal kimi,
Süzülsəm dilindən beçə-bal kimi,
Səadət müjdəsi - ilk vüsal kimi,
Həsrəti qəlbindən silsəm, ölmərəm.


Şübhə yelə dönsə, başımda əssə,
Sovurub aparsa o, hissə-hissə;
Müxənnət ayrılıq yolumu kəssə,
Eşqimin uğrunda solsam, ölmərəm.


Ürək istəyindən soyusa əgər,
Əhdin qamətini xəyanət əyər.
Sevda köhlənimə haqq olsa yəhər,
Min il tilsimdə də qalsam, ölmərəm.


Şimşəklər yolumda qılınc oynatsa,
İldırım səsindən qulağım batsa;
Sevdiyim ürəkdə murada çatsam,
Can versəm, ölmərəm, ölsəm, ölmərəm.