QOVUŞSAQ


Sanma ilham gəldi, alışdım yazdım,
Yox, namərd ürəkdən gileyimdi bu.
Yüz yol talansaydım, heç danışmazdım,
Odu oğurlanan ürəyimdi bu!


De, necə dinməyim? Ağıl müzəffər,
Ürəksə uduzub, xəcil olubdu.
Sinəmdə yanğıdan qalmayıb əsər,
Alov yoxa çıxıb, köz kül olubdu.


Söz-sözə yapışmır, qələm didərgin...
Yanar vulkan ikən buza dönmüşəm.
Sükut - çiynimdə yük, bədənim gərgin...
Havadan nəm çəkən duza dönmüşəm.


Fəqət qorxmayıram, demə: -dərd əyər.
Sən varsan, varlığın ovudar məni.
Bir ondan qorxuram, qovuşsaq əgər,
Buz bağlayan könlüm soyudar səni.