( Aşıq Famil Mikayılov-a ithaf edirəm )

Aşıq Famil, yaman dolub ürəyim,
Köklə sazı, qadan alım, de gəlsin.
Bir od qala, sinəm üstə, amandı,
Qanad açsın quş xəyalım, de gəlsin.

Dindir sazı, çimirlənim, dincəlim,
Cilalanım, hamarlanım, incəlim.
İlgəklənsin düyün düşən cəncəlim,
Qoy durulsun kefim-halım, de gəlsin.

Qərib-dedin, qərib düşdün, əldə saz,
Kərəm-dedin, yandı ahın cızhacız.
Koroğludan, qoç oğlundan bir ağız,
Diklə zilə, susma, Famil, de gəlsin.

Mən Vüsalam, çox aradım "Dilqəmi",
"Dolu hicran" aşiq dərdi, el qəmi.
"Təcnis" üstə buxovlansan qul kimi,
Vermə sazı, çağır, gəlim, de, gəlsin.