Biri vardı, biri yoxdu,
Dünya vardı, dərdi çoxdu.
Üz tutaraq öz dərdinə
Dünya bir gün dedi:-Sənə
Nə borcum var, a Dərd qağa?
Dərd söylədi: - şora, yağa
Qiymət birdi bazarında.
Azarı var azarın da!

Dünya üz tutdu qiymətə: -
Niyə birsən ota, ətə?
Qiymət dedi: - Bunu, Dədə,
Əti ata, otu itə
Necə gəldi satana de,
Haqqa nahaq qatana de.

Dünya üz tutdu satana,
Vicdan atıb var tutana: -
Bu nə alver, nə bazardı?
Satan Dünyaya bozardı: -
Mənə nə var, alana de,
Başına kül olana de.

Dünya üz tutdu alana,
Aldığına mat qalana:-
Nədir, Kişi, aldığın nə?
De, nə dərd üz verib sənə?
Alan güc verib səsinə
Eh - söylədi - nə vecinə,
Bir əlindi, bir də başın,
Altında da kosmik maşın,
Hazır gəlir yer-yemişin,
Bazarlarla yoxdu işin;
Alma düşsə göydən əgər,
Ətəyinə gəlib düşər.
Dolanırsan var başına,
Günəş səpir zər başına,
Dönür ulduzlar başına,
Dünya, bəxtəvər başına!