Dinlə, Qardaş, dinlə, sənə sözüm var,
Bu qələmlə, bu varaqla, necəsən?
Xəyal səyyar, arzu dadlı, ömür kəm...
Yaxın-uzaq bir soraqla, necəsən?


Doğma ocaq isindirdi qəlbimi,
Mizrab çəkdi, titrədi könlüm simi.
Dağ döşündə yorğun bir maral kimi,
Xumarlanan Ağbulaqla, necəsən?


Dost gəlişi çöhrəsinə nur səpən,
Mərd baxışın mərd gözlərindən öpən,
"Xoş gəlmisən" kəlməsiylə sərpilən,
Ətir saçan gül dodaqla, necəsən?


Bahar gəlib bu torpağa, bu elə,
Can verilib hər arzuya, əmələ;
Yaz küləyi daraq çəkirsə telə,
Göy ot üstə kef-damaqla, necəsən?


Yaşıl meşə, ürək oxşayan tala!
Çırpı gətir, yol üstə tonqal qala!
Şiş hazırla, tikələri xırdala,
Köz kababı, yüz araqla, necəsən?


Ağac altda yerə süfrə salmışıq,
Xoş diləyin əlindən cam almışıq!
Bəxtəvərik, doyunca kam almışıq!
Təşnə dodaq, buz bulaqla, necəsən?!


Diz bərkidib kef üstündən duranda,
Nə dilədin, söylə görüm, bir anda?
Xoşhallanıb, gözlər xumar vuranda,
Xalı sərmiş göy otlaqla, necəsən?


Axşam mehi, göy buludsuz, yer sərin...
Boz turaclar bəzəyidir bu yerin.
Sərxoş ovçu, titrəyəndə əllərin,
Sözəbaxmaz yar-yaraqla, necəsən?


Aşıq Famil saz götürüb dinəndə,
Bir mürgülü köz alışdı sinəmdə.
Bir ah çəkdim, cızdağ oldum, bu dəmdə,
Cızhacızla yanan yağla, necəsən?