Nə deyim mən sənə, nə deyim, ay dost!
Heç yerə sığmayır gileyim, ay dost!
Qəribə bir söhbət, pozuq bir ülfət...
Məsləhət kinayə səsi verərmiş!
Çılpaq bir həqiqət, təmiz bir niyyət,
Riya görünərmiş, don geyinərmiş!


Ruhumuz bir simə köklüydü bir vaxt,
Əqidə tay-tuşu, məslək tay-tuşu!
Bir zaman izimiz bir idi..Ancaq
İndi başqa-başqa yollar tutmuşuq.


İtmək asan şeydi, nə var itməyə!
Üyünüb, ələnib tapılmaq çətin!
Yad bir düşüncəyə, yad əqidəyə,
Qaraya ağ kimi, yad yamaq kimi,
Qondarılmaq çətin, yapılmaq çətin!


Düzün düz dostu var, əyrinin əyri,
Yağ suya qarışmaz min il də qalsa!
Əsrlər yorsa da ürək, nə xeyri -
Düşüncə çürüsə, fikir qocalsa!


Dedim:- yad qoltuğu boğacaq səni,
Minnət çirkabına bulanma, yazıq!
Aldanma, alçaltma ləyaqətini,
Haqqını özgədən dilənmə, yazıq!


Əyilmə ad üçün, əyən olsa, sın!
Çünki, küt qılınca gərək deyil qın!
Çalış, öz işığın, öz odun olsun!
Dünyanı boş-bekar dolanma, yazıq!


Quyruq ad aldımı "nəcib" işindən?
Ördək nə qazandı qaz yerişindən?
Demirəm, əl götür hər vərdişindən,
Deyirəm, adam ol, sülənmə, yazıq!