Gedirəm, Gözəlim, gəl yoluma çıx!
Şəhla gözlərinlə yola sal, gözlə!
Həsrət çən çiləsə cığıra, izə,
Çiskindən, dumandan xəbər al, gözlə!


Bahar havasını, bu doğma yerin,
Çaldım barmağıyla sərin mehlərin.
Yuyanda gözünü şeh çiçəklərin
Əhdimi, andımı yada sal, gözlə!

Vüsal fırçasıyla rəngləndi könlüm,
Vəfa pərdəsinə kökləndi könlüm.
Demə: - "Gedişinlə təkləndi könlüm",
Qəlbim səninkidir, buyur al, gözlə!