Pərvazlanır quş həvəsim,
Dağlar aşmaq istəyirəm.
Tanrıma tutub üzümü
Könül açmaq istəyirəm.


Əlim ümid ətəyində,
Fikrim arzu yedəyində.
Ömrün büllur qədəhindən
Aşıb-daşmaq istəyirəm.


Uçur xəyal zər qanadla,
Ülfətim var xəyalatla.
Vətən-deyib, Kainatla
Qucaqlaşmaq istəyirəm.


İnamıma qul kimiyəm,
Tamahımın hakimiyəm.
Bir rübabın tək simiyəm
Qoşalaşmaq istəyirəm.