Məsləhət istərəm mehriban əmi,
Yaddan dost köməyi uman neyləsin?
Mənzil ayağında, fikir köhləni,
Əgər mürgüləsə, azan neyləsin?


Şehli yuxusuna zülmət gecənin
Xoş bir avaz qatır sular da çin-çin...
Yaddaşı kəsmirsə yol azan kəsin,
Çalpaşıq izlərdə güman neyləsin?


Qonur çiynimizə çən yavaş-yavaş,
Yenə gileylənir sürücü qardaş.
Yadına gəlmirsə bu torpaq, bu daş,
Çən-çiskin neyləsin, duman neyləsin?


Çalır laylamızı dağların mehi,
Yuyur fikrimizi səhərin şehi.
Dünən günortadan alıbdır behi,
Həm suyu, həm yağı daman, neyləsin?


Vüsalam, nə deyim, söylə, bu hala?
Heç kəsi qalmasın köçündən dala!
Büzüşüb, söykənib farmaş-çuvala,
Gözünü çar-naçar yuman neyləsin?