Dağ yamacı, külək həzin...
Nə gözəlsən, ah, ay meşə!
Ciyərimdə buz nəfəsin -
Can yarıdı - oxay! Meşə!


Səhər mehi dinə-dinə
Sığal çəkir tellərinə.
Sinən üstə gül yerinə
Zərrin şəfəq tax, ay meşə!


Dərə - anan, ağdı başı,
Köçür qızı, sel - göz yaşı.
Ömür dostu, can sirdaşı
Sanır səni dağ, ay meşə!


Olub-keçən aydın sənə!
Nə sirr verim özgəsinə!
Ayrılıram səndən yenə
Ürəyimə bax, ay meşə!


Həm nəğməyəm, həm istəyəm,
Min arzuda, həvəsdəyəm!
Uzaq-uzaq yol üstəyəm,
Gəl, yoluma çıx, ay meşə!


Vaxt üyünür...əsir ürək,
Öz yağında yanır istək.
Duyğu titrək, ümid kövrək...
Dost əlini sıx, ay meşə!